Kusuma narek bukune seng ditindihi sikute Beni. Golek-golek. "Weruh petelotku ora?"

"Ora." Beni nyauri singkat. Cuek. Gek sibuk mbukak tas gendonge. "Awakmu piye karo cewek kelas XII IPA kae?"

"Sopo?" Kusuma jek panggah sibuk nggoleki petelote.

"Sopo kae? Warni, yo?"

"Mawar!"

"Lha, yo. Mawarni."

Kusuma nembe mangap arep nyauri. Beni malah buru-buru angkat driji.

"Wes. Menengo. Ora usah kakean alesan! Sak ombo-ombone alas, jek ombo alasanmu, Bray."

"Sopo seng tekok, sopo seng nyauri," Kusuma ngedumel.

Dekne mbalek fokus nggoleki petelote. Gek Beni mbalek sibuk ngubek-ngubek tas gendonge ngantek raine nempel neng bolongan tas. Kusuma seng ndelokne kelakuane Beni, malah dadi curiga.

"Eh! Petelotku mbok umpetne, yo?"

"Lambemu ndower! Ora! Aku lho nduwe petelot dewe," ujare Beni noleh sediluk. Terus mbalek ngubeki tase meneh.

"Lha, terus? Awakmu nggowo opo?" Kusuma narik tase kancane. Pengen weruh.

"Eneklah! Wong kok kepoan!"

Kusuma malah dadi semremet. Mergo iku, dekne langsung njejelne sekalian sirahe Beni neng njero tas. Beni dadi kelabakan. Tangane ngepak-ngepak koyo basur ngejak ihuy-ihuy.

Pas bangku seng dekne wong lungguhi arep nggeblak, Kusuma buru-buru ngadek. Tapi apes. Beni nyandak tangane, gek dadi tibo bareng. Cah loro kelesotan neng semen, kangelan menyat.

Beni narek tas teko sirahe sehinggane isine mbrodol kabeh. Utamane remukan rengginang seng mawut-mawut. Rambut lan raine juga ora kurang nek awut-awutan. Mergo jengkel, Beni langsung nguyel-nguyel Kusuma tanpa ampun.

Pas iku, enek Wulan seng ndelokne polahe cah loro iku karo melompong.

"Jane opo podo ora doyan wedokan, lho!" jare Wulan sak gelem-gelem karo nggletakne petelote Kusuma neng mejo.

Kusuma lan Beni podo-podo ndomblong. Podo-podone ngawasi petelot neng nduwur mejo.

"Wedus gembeeeelll!"

Wulan mlayu ngiprit.